14 October

बोधस्पर्शिका
*************
हळुवारपणे बघत बघत
गुंतलेल्या धाग्यांचे
गुंतलेपण घालवले जाते... पण
मानसिक गुंत्याचे तसे नाही.....
मनाचे गुंतलेपण अख्खे चे अख्खे दिसून येताच,
तो गुन्ता (ती समस्या) विरून जातो.
सर्व मानसिक समस्या पूर्णत्वाने व स्पष्टपणे
बघितल्या गेल्या की अचानक सुटतात,
सोडवाव्या लागत नाहीत.
अरुण

बोधस्पर्शिका
*************
पैसे देऊन झाले आणि
वस्तु ताब्यात आली की
वस्तु आपली होते
केवळ कागदोपत्री नव्हे तर
मनोमनी ही.....
आणि मग
त्या वस्तुशी निगडीत सर्व विवंचना
मनाला बोचू लागतात ....
यालाच म्हणतात...
The pain of attachment
अरुण
ही 'त्याची' फुंकर रे...
***********************
धावत्या नदी सवेच धावतो किनारा
श्वांस घाट करी प्रवास, जीवन क्षणधारा

वा-यावर पान उडे, पानावर जीव उभा
धरपडतो तू जपण्या क्षणभंगुर प्राण उगा
ही 'त्याची' फुंकर रे, हा 'त्याचा' वारा
धावत्या नदी सवेच धावतो किनारा

रेघोट्या काढोनी धरणी चे भाग करी
एक तुला प्राणप्रीय, दुसरा परदेश परी
हा 'त्याच्या' सृष्टीचा पसरला पसारा
धावत्या नदी सवेच धावतो किनारा

जीवन हे गंध देत फुलणा-या सुमनांचे
प्रेम करीत सर्वांवर, जगणा-या सुजनांचे
'तो' करुणा सागर, 'तो' प्रेमभाव सारा
धावत्या नदी सवेच धावतो किनारा

गेलेले सरले अन् येणारा एक भास
असणारा दिवस खरा, जिथे खराखुरा वास
असणारा क्षण जिवंत.. ईशचा निवारा
धावत्या नदी सवेच धावतो किनारा

धावत्या नदी सवेच धावतो किनारा
श्वांस घाट करी प्रवास, जीवन क्षणधारा
- अरुण