बोधस्पर्शिका २३ फेब्रुवारी २०१५

बोधस्पर्शिका
************
एकवेळ.... बाहेर चे तोफ गोळे
जमीनीत पुरता येतील
पण  उपयोग काय?...जर
मनांत तलवारी चालत राहतील
- अरुण
बोधस्पर्शिका
************
आई वडिलांनी 'वळण' लावले
'सरळ'  काय?- ते कळलेच नाही
वळ वळणांचे दुखतायेत तरी
सरळ होणे जमलेच नाही
- अरुण

बोधस्पर्शिका
*************
मासा कसे स्वीकारणार पाणी ?
स्वीकारलाय् पाण्यानेच त्याला
धर्म म्हणजे माणसाचे प्राण
माणुस काय स्वीकारणार त्याला ?
- अरुण
बोधस्पर्शिका
*************
शब्दात उतरवलेला अनुभव
शब्दात भेटत नाही
'पोहावे कसे' - हे पुस्तक वाचुन
पोहणे जमत नाही
- अरुण
बोधस्पर्शिका
************
शांत व्हावे चित्त म्हणुन
देवळात शिरतो
घोष करीत घंटा बडवीत
देवालाच पिडतो
- अरुण
बोधस्पर्शिका
***********
हरवला आंतल्या
दाट अंधारात
पण शोधतो आहे
बाहेर च्या लख्ख उजेडात
- अरुण
बोधस्पर्शिका
*************
काठावर बसुन जपजाप केल्याने
प्रवाह पाण्याचा कळत नाही
जो नदीत उतरला.. तो
जपजाप करत बसत नाही
- अरुण
बोधस्पर्शिका
************
अनुभवाला गाळून
प्यायचं नसतं
माहीतीला तपासून
घ्यायचं असतं
- अरुण

बोधस्पर्शिका
*************
अंधार मिटवण्याचे दोन प्रकार-
दिवा पेटवा
किंवा
प्रकाशा ला द्या वाट
- अरुण
बोधस्पर्शिका
*************
सृष्टी ही एकच एक
त्यात नाही वजा-बाकी
तरीही माणसाला
संपण्याची भीती
- अरुण
बोधस्पर्शिका
*************
आकाशात उडणारे पक्षी
धरणीच्याच पकडीत असतात
मनाला लागलेले मुक्ती चे वेध
मनापासून वेगळे नसतात
- अरुण
बोधस्पर्शिका
************
माळ दिव्यांची ...
एक दिवा विझतो
अन् लगेचत पुढचा पेटतो
यामुळे माळेत सातत्य व वेग भासतो
- अरुण

बोधस्पर्शिका February 11

बोधस्पर्शिका
*************
शब्दाला व्यक्त होण्यास
शब्द लागतो
निशब्दाच्या अभिव्यक्तीत
शब्द खुंटतो
- अरुण




बोधस्पर्शिका
*************
बुद्धी केवळ एक यंत्र जगण्याचे
संकटे घडवत आहे
साधन साधन राहिले नसून
'बाधन' बनत आहे
अरुण
बोधस्पर्शिका
**************
संग्रह करणे धर्म ज्याचा
त्याला म्हणतात मन
रिते होण्याची कल्पना ही
तयाचे नवे धन
अरुण

बोधस्पर्शिका
**************
ज्याला जमत नाही जगणे
तो हसत किंवा रडत आहे
जीवनात प्रत्येक क्षण मात्र
अानंदमयच आहे
अरुण
बोधस्पर्शिका
*************
जे काही घडते
बाहेर किंवा मनांत
ते घडते
फक्त वर्तमानात
- अरुण
बोधस्पर्शिका
*************
सूर्या पासुन पळणारेच
प्रकाशाची वार्ता करतायेत
घृणेच्या आकाशात
ढग धर्माचे गरजतायेत
- अरुण







बोधस्पर्शिका
*************
पळणाऱ्याला  'थांबणे'
कसे समजणार?
प्रपंचाला 'धर्म'
कसा उमजणार?
- अरुण

बोधस्पर्शिका
*************
आकाशात उडताना
आकाश व धरणी मधले अंतर दिसते
अंतरिक्षातुन बघताना
आकाश व धरणी एकच दिसते
- अरुण
बोधस्पर्शिका
*************
ज्यांना फळ हवय् लगेच
ते अधीर होतात
कुठेतरी श्रद्धा ठेवतात चटकन
अन् मोकळे होतात
अरुण


बोधस्पर्शिका
*************
जरी सर्व शून्ये सारखीच गणितात
'किती गमवल्यावर शून्य झाले'
ही तुलना शिल्लक राहते - मनांत
- अरुण

बोधस्पर्शिका
*************
प्रतिबिंब दिसतं आरशात
आरशात असत नाही
मन वाटलं मेंदूत तरी
मेंदुत असत नाही
- अरुण
बोधस्पर्शिका
*************
भूत सजवलं की
स्वप्न बनतं
स्वप्न थिजलं की
भूत बनतं
- अरुण
बोधस्पर्शिका
*************
धन साचलं की
छाती फुलते
ज्या पेटीत साचलं
ती न भुलते
- अरुण
बोधस्पर्शिका
************
भक्तच जन्माला येतो
जन्मानंतर विभक्त होतो
मग आयुष्यभर
भक्ती साठी तळमळत राहतो
- अरुण
बोधस्पर्शिका
*************
खरे तर, ज्ञाता कडून
अज्ञाता कडे जाण्याचा हा प्रवास
म्हणजेच हे जीवन
परंतु...फक्त ज्ञाता भोवतीच
चालु आहे ही वणवण
- अरुण
बोधस्पर्शिका
*************
शब्दाला अर्थ शिवला  की
अर्था विना कांहीच असत नाही
रोग परिचयाचा लागला की
अपरिचित कांहीच उरत नाही
अरुण

बोधस्पर्शिका
************
सत्याला रूप नाही, स्वर नाही
गंध स्पर्श अन् स्वाद ही नाही
जे जे झाले इशारे सत्या कडे
दुनिया त्या इशाऱ्यांनेच भुलून जाई
- अरुण

बोधस्पर्शिका
*************
चार घाबरलेली माणसे
एकत्र बसतात
इतरांना घाबरवण्याचे
उपाय शोधतात
- अरुण